Eph 6 | KYG | STEP | Mafa'nemogitapae, hu'na, Ala kava ne'mo agi'alefe'mo itatapi afotapimogi ge'apimo afiyo, ge'apimo ne'afiya kava'mo fatago kava'mo hane'niya'mofe'mae.

Ephesians 6

Mafa'ne'api'e ita'api afo'apimogi'efe'mo hu'niya gemae

1 Mafa'nemogitapae, hu'na, Ala kava ne'mo agi'alefe'mo itatapi afotapimogi ge'apimo afiyo, ge'apimo ne'afiya kava'mo fatago kava'mo hane'niya'mofe'mae. 2 Ke'aepa gemo'a huno'ae'mo,itatapi afotapimogi apaki'apile'mo alita asaga hutapa maiyo, huno hu'niye. Alu ke'aepa ge'amo hane'niya'monanafa mani ke'aepa gemo hogote ke'aepa gemo ani kava'mo hisaya'mo'mo lapa maegauve, huno hu male'niya polomasi ge'e'mo magokepi lokae'ana hane'na'ae. 3 Mani polomasi gemo'a huno'ae'mo,ani gemo akame nehisayana alagepa hutapa yatala afina'mo ma mopafi'mo maigae, huno hu male'niye. 4 Afo'apimogitapae, mafa'netapimo apaipamo lesiya ya'mo alita o'apamitapa Ala kava ne'mo ge'age'mo alita apaya ne'maletapa alita api aitapa alagepa huta yagaitapa apateyo.

Ali'ya'mo ne'aliya vaya'e ali'ya aepa vaya'efe'mo hu'niya gemae

5 Ali'ya'mo ne'aliya vaya'mogitapae, lapakaemo Ala kava ne'mo ge'amo ne'afiya kava hutapa ali'ya aepa vayatapimogi ge'apimo afiyo. Fiku yanagetapa lole lapakesamo afigayanagi koli hutapa atete nehutapae'mo lapaipafati'mo ge'apimo afiyo. 6 Ali'ya aepa vayatapimogi apaulagale'mo mai'netapae'mo amuse hu'a lapatesayafeke'mo ge'apimo o'afitapa Kalaisi ali'ya'amo ne'aliya vaya'mo mai'naya'mofe'mo Goti'a hau'niya agufa kava'mo hutapa lapaipafati'mo ge'apimo afiyo. 7 Ali'ya aepa vaya'aitefe'mo ali'ya'mo ne'aluve, hutapa osuta, Ala kava netefe'mo ali'ya'mo ne'aluve, huta kanale lapaipamo kali'netapa ali'ya'mo aliyo. 8 Lapakaemo ago afi'nayana kalavusi ali'ya'mo ne'aliya vaya'mogimofi afa vaya'mogimofi hu'a alagepa kava'mo hisageno'ae'mo Ala kava ne'mo'a alagepa miya'apimo apamigiya'mofe'mae. 9 Ali'ya aepa vaya'mogitapae, lapakae'e'mo apakaetegamo ani agufa alagepa kava'mo hiyo. Koli hisaya agufa gemo hapa opaitapa afa'a ataleyo. Lapakaemo ago afi'nayana yagaino nelapateya vekamo koku'napi mai'neno yagai'a ne'apataya vaya'aitega'e ali'ya'mo ne'aliya vaya'aitega'e'mo alagepa huno magoke agufa kavake'mo huno alino fako huno ne'apate.

Kalisitini vaya'mo ati vayakana hu'a mai'naya gemae

10 Henaga ge'nimo lapa pai'nae'mo, Ala kava nepi'mo mai'netapae'mo lapayamufa valetapa himamu'amo ali'netapa lokiya vaita maiyo. 11 Lapakaemo muki kame hisaya kukenamo Goti'a alino lapami'niya kukenamo alita vaitetapa maiyo, Satani'a lapamalageka nehisigetapae'mo kame nehutapae'mo he titapa maigayanagi. 12 Na kava hinagetaene. Lagaemo apakufa'e kola'api'e'mo ali'naya vaya'e'mo kame nosuna'monanafa koku'napi'mo mai'ne'a hosu kava'mo hu'a yagai'a ne'apataya apaune vaya'e'mo kame nehune. Ala apaki vaya'enagi himamu vaya'enagi ma mopafi vaya'mo hani yapi'mo ne'maiya vaya'aite'mo yagai'a ne'apataya vaya'enagi huta kame nehuna'mofe'mo 13 Goti'a kame hisaya kukenamo alino lapami'niya kukenamo alita vaitetapa maiyo. Alita vaitetapa mai'nisayana hosu afina'mo afole ne'aisigetapae'mo kame hume hume utapa huta hano nehutapae'mo he titapa maigae. 14 Lama ge kava'mo mapalugana huno hane'niyanagi he titapa ne'maitapae'mo lama ge kava'mo hutapa aeyo. Goti ge'amo akame nehaya kava'mo aeni siotigana huno hane'niyanagi Goti ge'amo akame nehutapae'mo alitapa vaiyo. 15 Alagepa faigoko ge'amo'mo alino nanu aeno lapate'niya gemo sukana huno hane'niyanagi alitapa vaigeno'ao alo huno lapateno. 16 Ani kukenamo alita vai'netapae'mo lapakesa afita fatago nehaya kava'mo halegukana huno hane'niyanagi lapakesa afita fatago nehutapae'mo aliyo. Satani'a ata kae malefa keveleti'mo nelapaesigetapae'mo haleguteti'mo afa'a aetapa yu hegae. 17 Goti'a lapakufamo alino katino lapate'niya kava'mo aeni kakolitagana huno hane'niyanagi lagufamo alino katino late'niye, hutapa alitapa maleyo. Goti ge'amo Auneme'amo naipe'agana huno hane'niyanagi aliyo. 18 Ali'netapae'mo muki alu nunumu alu nunumu'mo huge Gotife'mo aukaya huge nehutapa Goti Auneme'aleti'mo nunumu'mo hutapa maiyo. Muki afina'mo o'ataletapa muki Goti aote vaya'ae'mo nunumu'mo hutapa apateyo. 19 Goti'a naha maesige'na alino fala ki male'niya alagepa faigoko ge'amo koli osu'na alagepa hu'na ae'na hakalo hu'na hapa paisuvafe'mo nunumu'mo hutapa nateyo. 20 Ani gelefe'mo Goti apa veka'amo kalavusifi'mo mai'nove. Goti'a alino nami'niya gemo koli osu'na lokiya gemo hu'na ae'na hakalo hu'na hapa paisuvafe'mo nunumu'mo hutapa nateyo.

Ge apamamae'niya gemae

21 Tikikasi'a lahau'niya konagatimo'a Ala kava ne'mo ali'ya'amo o'ataleno muki afina'mo alagepa ali'ya'mo ne'aliya vekamo lapakaetegamo uno'ae'mo nagaefe'mo ina kava huno ne'maiye, huno nava gemo huno lapa paigiye. 22 Ani kava'mo hu'a mai'nae, huno lapa paisigetapa afitetapae'mo lapaipamo'mo falu hisiyafe'mo ali'na ate'nogeno u'niye. 23 Afotimo Goti'e Ala kava netimo Yesu Kalaisi'e'mo alagepa hu'ana lapa maesa'agetapa konagatapimogi'e'mo magoke lapaipa lapakesamo ali'netapa lapakesa afita fatago hutapa lapau lapayamopafi'mo lapaino. 24 Goti'a Ala kava netimo Yesu Kalaisife'mo hapau apayamopafi'mo hapaume hapaume ne'vige'apae'mo o'atale'a muki afina'mo nehapaisiya vaya'aina fiku hapa maeno apamino. He, lama ge.